1959, dann Cuba, in diktatïr i tonm, sèt Battista. In bann moun barbï, avèk Fidèl Castro, i pran lë pouvoir. Lë tan la pasé. La-ba, bann cubain la konèt lë bon avèk lë moin bon.
Pé sfèr in jour, banna va kas sak zot la mèt zot mem anlèr. Pé sfèr, in jour, zot i di zot mem la révolïsion la fini. Solman, nana in takon z’afèr i jèt arpa : nou sava pa fé in katalog, nou va parl solman la guèr kont "l’illétrisme".

Donkalor, a s’ki prétan, lariv in jour gouvèrnman Cuba, la di bann marmaye lékol : « éstop in kou avèk lékol, alé partou pou amontr lir sak i koné pa ! ». Bann marmaye la parti. Pandan inn’an, zot la parti partou, zot la amontr lir bann moun té i koné pa. I prétan, la donn in bon rézilta.

Tousa pou dir, i fo fé la guèr "l’illétrisme". Na tro, sa issi, i fo lïté kont sa.
Bien sïr, Cuba sé Cuba, La Rénion sé La Rénion. Sak té bon pou la-ba, la pa forsé sa lé bon pou issi. Solman, nana in n’afèr lé vré pou shé zot, konm pou shé nou : si lë pèp i rant pa dann ron, i fo pa atann in bon rézïlta vitman. Sïrtou, i fo pa kont sï lë pèp pou dir sa sé son viktoir. Règ lë kont "l’illétrisme" : sa in bataye pou ranporté.

Justin