Zot i koné, dopi kinz mars, dan tout sipèrmarshé, lé sansé d’avoir in list produi pou fé fèr anou z’ékonomi. I parétré nana san uit produi dodan, é si ou i ashèt arienk bann produi-la, lé forsé ou i fé z’ékonomi.
Dopi kinz mars, moin lé fine alé kèk foi dann gran sirfas, é mi doi dir azot, moin la pa fé atansion ban produi-la. Sré t’i pars moin na poin l’abitid ashté bann marshandiz-la ? Sansa pars li lé plasé in l’androi i oi pa li forséman ? Donk, samdi moin la parti fé inn-dé komision é moin la romark bann produi lé an ba, kaziman o ra di sol. L’avé l’étikèt dosi, lété marké boukliyé kalité-pri. I tonm bien, moin té apré rod in paké kafé. Mi an apèrsoi, lo pri, sé in éro katrovin. Bon n’afèr mi di, solman mi rogard kosa na d’dan, mi oi san-pour-san kafé. Lé bien bon ! Mé san-pour san-kafé Robusta. La lé moin bon ! Pars an zénéral, i mélanz Robusta avèk Arabika, pou gingn boir : inn lé dir, l’ot lé dou ! Robusta tousèl i rash out fon d’gorj ! Moin lé sir, in moun i boir sa in kou, dé kou i trouv pi ali, mèm si lé bon marshé.
Boudikont, m’a dir aou, fransh vérité, moin lé pa dakor manj bann produi oblizé, pars moman doné, moin lé ragoulé, mi anpé pi, mésié, mi di aou. Pli pir, mi oi sa konm in zanr d’ségrégasion. Demoun, san bésé, i ashté produi zot la shoizi, sak lé zot otèr, é moin mi bès atèr pou moin alé shèrch bann marshandiz mésié Lurel la shoizi po moin. Mésié Lurel, ou i ariv ou la ? Alé dann in gran sirfas, ashté bann produi dsi out list, ariv out kaz sanm sa. Moin lé sir out madam i pil aou avèk roulo la patisri. Ou i koné, nout tout lé parèy : nou na in sèrtin gou, ni fé in sèrtin shoi. La pa sèt-la touléka. Out réjime, pou moin, li lé ziska danzéré.

 Justin