Kan la sign promyé z’akor Matignon, in dalon la di amoin, sanm pou li, sré normal l’Éta i arfé lo trin épi i pran sa sou son sharj. Solon li, konm dann tan l’avé lo trin dopi Sin-Pyèr ziska Sin-Bénoi, é l’Éta lokal an konplisité avèk bann gro La Rényon la kas trin-la. Arzout èk sa, konm i oi bien zordi, si ou lé pliz ou moin rézonab, ni pé pa s’anpas lo trin sansa nou lé kondané par lo koma sirkilatoir. Donk, sré normal l’Éta li-mèm i arfé lo trin. Kan i fé in bétiz, i fo réparé. L’Éta la fé lo kouyon, i fo li répar déga li la fé.

So késtyonn réparasyon-la, sa i sava rod loin sa... Alon mèt dsi koté, pou zordi, dé krime kont l’imanité nout pèp la konèt : la trèt épi l’ésklavaz. Arzout èk sa, lo rézime z’angazé lété pa tro in bon n’afèr pou nou. Mèt dsi koté, la pa obliy ali, pars nana pou dsikité la-dsi. L’èr-la, ni pé anparl lo rézime kolonyal la bar shomin nout dévlopman. Ni pé anparl osi lo sinkant-an la mèt pou aplik in loi départman fransé. Ni pé anparl ankor la frod dann z’éléksyon la anpèsh anou an avoir lo bann z’éli ké nou té i vé, épi konm i di souvan, la gouvèrnans nou té i réklam. Tousala la anbar nout shomin.

Donk, zordi, ala ousa nou lé randi, é sé l’Éta l’otèr, épi son bann konplis, bann gro, bann profitèr, bann z’ésploitèr... Moin lé sir, in pé l’apré mazine, mi domann pa konm i fo, mi di pa sifizaman siouplé, mi fé pa asé z’énifléksyon. Alor, in pèp kolonizé i doi èt poli ! Alor, in pèp kolonizé i doi partaj lo bann dépans ! Alor, in pèp kolonizé i doi tyinbo kont difikilté bann kolonizatèr ! Mi pans pa konm sa : pou moin, i fo réparé pou mèt anou l’androi nou noré été fine arivé si l’avé pa poz lanspèk dsi nout shomin toultan, toultan !

 Justin