Médam zé Mésyé lo réshofman klimatik la pa in plézantri, sof pou lo prézidan amérikin Trump. Pou kosa mi di sa ? Sinploman na inn dé somenn in gran fé la dévast in bann foré dann sud-ouest l’amérik. In gouvèrnèr parti démokrat la di ali, sa in konsékans lo réshofman klimatik - inn dé zour avan lo linsandi i démar la fé ziska 54 dogré dann péi-la. Lo prézidan la di, li kroi pa lo réshofman klimatik é pou li an kon trèr klima i sava rofroidi… Lé ga, demoun fou néna mé lé domaz kan ou lé prézidan in gran péi konm l’amérik.

Mi di azot sa konmsa, pars si zot i rogard dsi l’internet, zot va oir in bonpé péi é in bonpé d’moun i prépar pou bann shanjman klimatik i sava arivé d’apré sak zot i kroi. Konm moin zot la sirman antann dir bann prodiktèr chanpagn i ashète sansa i loué bann tèrin pli o nor ké la champagne ziska dann l’anglétèr pou oir si zot i sava pa déplas zot plantasyon rézin firamézir in pé plis dann nor. Si zot la gard télé zot la sirman vi dopi 75 zour la plui l’arète tonbé Marseille. Tienbo azot bien, la pa tonm in goute dolo. Sa lé sèryé sa ! Mé dann d’ot départman la tonm an dë zèr la kantité d’lo i tonm dann in n’ané. Parl pi déga la fé !

Astèr in pti nouvèl pou nou péi tropikal. An gardan la télé, mi oi in gayar karo mang, pyé banane, zanana épi tout kalité frui i trouv isi La Rényon-tansyon pangar talèr va plant létchi sansa longani. Pou kosa mi di sa ? Pars sa i éspass dann Palerme-dizon la Sicile - in plantèr téi sort Hawaï la désid plant ousa li lé koméla tout bann frui lé téi plant Hawaï é a s’ki paré l’érop i ède ali touzour pou prépar lo shanjman klimatik… Mé zami, mi di pa zot sa, pars moin la pèr lo syèl i tonm dsi nout tyète, mé néna dé koi rofléshi non.

L’èrla, moin néna in pansé pou Paul Vergès, moin lé sir si li lété ankor par isi li noré tir lo signal d’alarm. Pa pou fépèr pèrsone mé pou prépar l’avnir pars si ni komans pa rofléshi bonèr, nou l riskab rogrété apré. Antansyon banna i rash nout kro d’prodiktèr produi tropikal.