Sominn pasé, mwin lavé fé on modékri d’si gro shalèr i pwak a nou dopi Zanvyé. Lavé pwin bonpé té i koz ladsi. Mé forstan la shalèr i donn, désertin i komans zordi détak la lang, épi i komans bouzé osi.

In madanm, dann télé i rakont, koman minm aprè son bin, dolo transpirasyon i koul d’si son kor. In not, i di koman an vil, li vyin fou, li kour rod kouran dèr, in vantilatèr, ou in kwin la klim. Mé la pa tousa. Parsi, parla, bann paran délèv i komans rouspété. Akoz dan la klas, i fé tro sho, dan la kour lékol na pwin pyé d’bwa, pa minm in préo pou anbar solèy. Zanfan i gingn mal dann z’yé, sansa mal dann krane, lé fatigé kan i sort lékol lo swar. Bézman i komans pété. Mé tousala té prévi. Dan in mwa anviron, la shalér va lé, paran délèv va obli inpé. Mé lané proshinn, é lé zané apré, tansyon pangar ! Zéli lé prévni.

Dotan k’nou la pa fini ék lo résofman klimatik. Dapré in rapor in bann zéxpér la NASA, ki vyin d’tonbé, disi inndé zané, akoz logmantasyon d’gaz dann latmosfèr, bon pé niaj va shyé ansanm. Konsékans, la shalèr va armont plis an flès ankor. Pétèt ziska minm 8 dogré anplis. Zot i mazine inpé ?

Lé gran tan lo bann politik, épi sak sitoyin osi, i pran sa vréman o séryé. Sinonsa, nou lé fouti.

Pol