Matante Zélida la ékrir Justin :

Mon shèr nové, éspès salté.

A bon ! Konmsa zot i lé don ! Alor zot i pran la défans bann péshrès, bann zakavouèl, bann sak i sava dann travay pou détourn léspri bann moun rézonab. A bon ! Sé bann kasèr d’ménaz i intérès azot ! Oté ! Moin sré kontan k’i ariv azot in n’afèr k’i fé bien mal, k’i fé singn zot kèr ; Pars zot nora bien mérité. Tok ! Pran sa pou toué !


Justin la fé aèl pou répons :
Matante, mi koné ou lé abitié koz konmsa, mé malgré sa, i fé amoin kèk shoz. Pars vou ossi, kan vou lété jènn, vou té i abiy pa suivan la mod vou ? Si lavé in joli piès linz té i mété aou an valèr, vou té i krash dessu ? Alé dormi don !Épi fé pa koz amoin initil pars vou ossi, demoun la jaz déssi vot kont... É pétète kan néna la fumé, na d’fé ossi ! Vi kroi pa ?
Mé la pa sa mi di a ou ! Sak mi di aou, sé k’i fo réspèk le mond, épi pa rann azot maléré dann zot travay ; Sé k’i fo pa fé le arsèlman.
Matant, lé zome, sé lé zome, kome lé fam, sé lé fame, é in koud ’grizou lé touzour possib arivé. Mé nou sé pa d’zanimo, alor i anpèsh pa nou fé le possib pou mate in pé nout zinstin. Lé vré, lé pa vré ?
Dann tou lé ka, i fo an avoir réspé pou l’moun !

Justin