I di souvan, issi La Rényon, lé difisil ékrir listoir pou in bonpé rézon. Listoir ofisyèl, sète bann klass dominante lé ankor fézab, mé sète bann ti-kolon lé plis ké dir. Sé pou sa i fo pa alé gro-doi in pé partou, kassé san rodé si na poin in n’afèr pou konprann, pou éspliké… arzoute èk sa, plis v’alé, plis va trouv moiyin pou fé koz bann z’objé la pankor déklar z’ot ségré.
La nou lé blizé arvir déssi la késtyonn patrimoine, pars lé kant mèm trist oir in pé kass bann kaz kréol, gran konm pti, défons la kour kout kapapilar, fouye lo trou pou fé parking san savoir si kékpar la pa détrui san savoir in rishèss té la, té i dor épi pèrsone l’avé pankor trouvé. Kass in kaz kréol, sé ossi kass bann kalbanon, kass bann shomin galé, farfouy la tèr zardin san pityé.
I di k’i pé kassé déssèrtènn foi, solman i fo arkonstrui parèy... kan i konstrui parèy ! Mé fé in fo l’imitassyon la pa bon. Transform in gran kaz an modèl rédui, sa i fo pa fèr. Oubli bann kalbanon, bann mal lontan, bann vyé zoutiy, sansa d’ote z’afèr ankor, i fo évité ? Bin i konpran pa déga dé foi l’apré fé ? I rosanm pou moin bann démolissèr-la, na aryink larzan i konte pou zot... lo rèst i konsèrn pa zot.
Réspèk in pé nout patrimoine, foutor !... réspèk nout listoir !

 Justin