Na défoi, ou lé riskab tonm dann malizé... na in danzé i ménas aou, mé ou i fé konm si doriyin-n’été. Sa lé vré pou d’moun normal, é sa lé vré galman pou bann bank, pou bann gouvèrnman. L’èr-la, kan lo dézagréman i ariv, lé pa paré pou riposté. Mi souvien, l’ané 2008, kan minis l’Ékonomi la Frans té i di, bann bank fransé lé garanti kont tout kalité l’inkonvényan. Touzis si gouvèrnman té i bat pa dsi l’éstoma pou di bann bank fransé sé lo méyèr an parmi lo méyèr... dizon shokola lo méyèr.

L’été la mansonzri, sansa l’inkonpétans, sansa inn épi l’ot mèm tan, pars té blizé trouv in gro kantité larzan pou anpèsh bann bank pran lo fon, kapote dan la kivèt.

Astèr i di anou, lo péi la rant dan in nouvo kriz, i apèl la kriz la dèt. Antansyon, sé la dèt lé an kriz, la pa lo péi késtyonn finans. Solman lé vré, nana d’ot péi lé pli annuiyé ké la Frans, mé i vé pa dir non pli, li lé dan la sékirité. Li fé lo fyèr, kosté ansanm l’Almagn, mé dizon la vérité, li marsh in pé an kas-in-ki. Moin la tandi dir, dan lo koupl Fransé-Zalman, sé lo koté fransé ké lé malad. Sé dir azot ! Pli pir, gouvèrnman i vé pa ronons son politik ékonomik favorab pou bann rish, défavorab pou bann ti-kolon épi pou bann klas moiyène. I fo dir osi, sa in promès Sarkozy la fé bann milyardèr, zis kan li la gingn z’éléksyon. La pa sa mèm i apèl lo sèrman lo fouket’s ?

Mé ziskakan in n’afèr konmsa i pé roul sansa ron, o moins domi-ron ? La vérité, i paré, i pé pa manti lontan avèk. La vérité nana tèt dir. I prétan dir, lo péi i marsh dsi l’ané 2012 avèk in kroisans zéro, san plan pou rolans l’ékonomi, san plan pou rédui vréman la dèt. Fransh vérité lé ga, in pèrsone i pé fé lo kouyon avèk son prop l’arzan. Si li la pèrd, sé son biskui ! Mé fé l’kouyon avèk la rishès la nasyon, sa lé pli grav, é pou moin, sa i mérité in prosé. Pars ni oi pa li fé in bon parad, é dann in ka konmsa, mi pans, li lé résponsab, é li lé mèm koupab.

Justin