Kisa lé résponsab réshofman klimatik ? Ala in késtyon souvan dé foi mi poz amoin é l’èr-la mi antann in pé apré di : « Toulmoun lé résponsb réshofman klimatik ».

Moin lé résponsab réshofman klimatik pars mi ansèrv lo gaz, pars mi mète gazoil dann mon loto, pars mi alime plin po tout bann limyèr an plis néna dan mon kaz. Mon voizin lé résponsab konm moin pars li fé mèm shoz ké moin. Mon bann famiy galman. Dakor lé bon !

Mé a bien kalkilé moin noré s’an pass gazoil moin si l’avé in n’ot karbiran k’i réshof pa sansa i réshof moins lo klima konm dolo, l’èr, solèye épi d’ot ankor ! Moin nora s’anpass lo gaz pou kui mon manzé si l’avé in méyèr z’afèr pou brilé moins danzérab pou lo klima la tèr. Parèye, pou la limyèr ! Parèy pou tout sak i fé in l’éfé d’sèr é i fé shof lo klima. Mon voizin noré fé parèye galman. Mon famiy osi nora fé konm moin sirtou si i kout anou moin shèr.

Pars la pa, konm i di par gété d’kèr ké ni viv konm ni viv koméla.

Lé shoz n’arpa été konmsa si momandoné bann manifaktiryé, sansa bann kapitalis l’avé pa désid bril sharbon, bril pétrol, bril lo gaz, monte in sivilizasyon gaspiyaz l’énèrji pou grosi z’ot pla azot, pou antass larzan, san pans tousa bann moun dsi la tèr téi bénéfisyé pa sak in pé i apèl lo progré.

Alor, toulmoun lé résponsab réshofman klimatik. Toulmoun, mé plizoumoins, pars ni pé dir néna bann vré résponsab, lo bann koupab mi anshèv dir épi lé z’ot : konm ou, konm moin, konm bann réfijyé klimatik a vnir é tout sak la plito sibi ké bénéfisyé d’sa.