Oté

Rézilta lo rasism bann fors i di de l’ord : L’anvi irlé i pran aou si tèlman in sène konmsa lé insiportab !

Justin / 2 zwin 2020

JPEG - 43.6 ko

Mé zami, mon bann dalon(e), néna désèrtènn shoz zot konm moin-moin lésir - ni yèmré pa oir. Mi vé anparl azot lo l’asasina in noir amérikin vantredi pasé dann in gran vil laba dann l’amérik. Pou kosa sa lé insiportab ? Pa tèlman pars sé in l’asasina-l’asasina néna partou dsi la tèr malorozman. Pa pars l’asasin sé in polisyé - pétète dé, pétète troi - pars mi pans pa finaldekont bann polisyé lé moin kapab ké lé zot pou fé bann krime abominab konmsa . La pa pars nou lé dann l’Amérik, pars dann tout péi néna krime dsi bann pèrsone lé pa dann in sityasion pou défann azot.

Sak pou moin lé pa siportab, sé kan ou i oi in moun i apartien bann fors polis, d’ in gran péi demoun i apèl démokratik, apré étouf avèk son zonou son viktime avèk in détèrmnasyon in kroiyab avèk métod konm pou bien amontré néna poin d’ot solisyon dann sète afèr-la ké la mor pou lo viktime. Arzout èk sa son kolèg i protèz ali, i anpèsh demoun ava, sé avèk dizon lo bienfondé lakstyon bann fors i di de de l’ord..
Moin la lir kékpar pou étouf son viktime lo polisyé la mète in kar d’èr, an atandan son bann kolèg polisyé i ariv. In kar d’èr lo ga apré étoufé avèk lo zénou polisyé dsi la gorj. Dabor li di i gingn pi réspiré - mé l’ot i arète pa - é aprésa li gingn pi di arien, li mète in tan fou pou li mor.

Mé l’orèr i arète pa la, konm in mashine bien uilé shakinn i zoué son rol. L’anbilans i koné lo ga lé mor, sansa kaziman, mé i transport ali kant mèm lopital sirène irlan dan la vil . Plitar kan lo potoroz lé dékouvèr, lo polisyé lé arété é i mète ali an égzamin par raport li la donn la mor san intansyon doné. Zot la bien lir ; san intansyon. Moin sré pa étoné, sa i anons a l’avans in lakitman an bone é du form. Lé fézab avèk in bon lavoka, avèk in jury mèm ras ké lo kriminèl é avèk in zistis konm bann L’Amérik i koné kan in blan i asasine in noir. Lé fézab si lo viktime sé in noir é sé lo ka é par avans konsidéré konm in kriminèl.
Soriz dsi lo gato, kan bann afroamérikin i révollt in pé partou dann l’Amérik l’èrla lo Prézidan l’amérik i fé bann déklarasyon skandal, konm nou la antann dann télévizyon… Dovan in n’afèr konmsa, in moun normal, si li lé pa dann landroi néna arienk l’anvi irlé si tèlman tousala lé insiportab. Pars pou ète insiportab, sa lé insiportab !