Si ni rogard dann diksyonèr kréol fransé Alain Armand lo mo « goulipia » ni oi sa i vé dir gourmand, krévèr. Moi d’séktanm lo roi la manz létshi an goulipia(zistoir Axel Gauvin : pou in grap létshi. Astèr si ni sava oir dann somi-lo-mo Daniel Honoré ni trouv lo mo « goulaf »épi « goulipia »avèk konm informasyon « manz gouluman ». Dann diksyonèr Céline HUET si ni gard lo mo gourmand ni trouv in shaplé lo mo avèk goulapia, krévèr, vorass, goulaf, gondal… Boudikont ou i trouv bann mo konmsa dann la kiltir popilèr. Mé la pa sa mi vé anparl zordi.

Kosa mi vé anparlé d’apré zot ? Lo trin éksprèss bann morisien i sort fé l’inogirasyon néna inn-dé zour. Ala in n’afèr nou la révé dopi lontan é l’èrla sé nout bann kouzin morisien i fé sa an promyé. Si l’avé suiv Paul Vergès épi lo parti d’lalyans, dopi 2013-2014 nou nora fine fé nout tram-train. A ! Lo trin, fransh vérité sa sé in n’afèr éstra sa pou nou dann nout mazinasyon. Kan ou i sort out kaz in sèrtène èr, é ou i pé dir m’ariv l’androi mi sava tèl èr, sa sé in n’afèr i kont pou l’moun sa. Alé oir koméla, ou i gingn mèm pa di a popré kélèr ou va rivé, sof si ou i sort out kaz avan l’èr poul i lèv. Si tèlman ou lé risjkab ète pris dann l’anboutéyaz.

Mé néna d’moun i koz pa konmsa : zot i di o final lo trin lé bon pou Moris é li lé pa bon pou nou. Ala pou kosa lo kozman moin la mark an-o la pars i rovien dann mon tète, pou di sinploman konm dann la fab « lo ronar épi lo rézin » : Rézin lé tro vèr lé bon arienk pou bann goulipia, tousa pars rézin té tro o é li téi gingn pa trapé.. Astèr ni pé rofléshi in kou la dsi pou oir koman désèrtin i tansform zot résponsa bilité konm pou dir sak zot kala fé pou La Rényon lé b on é pou kl’trin nou va oir pli loin-si ni sava pa arvoir sa tro loin.