Rozman nout gouvèrnman i vèy déssi nout pouvoir ashté... Mèm, li la promète anou, sa sé in priorité prioritèr pou li. Alor, konm i mank amoin toultan vin santime pou fé in éro, konm pou moin la fin lo moi i ariv bonèr, alor moin la di dann mon kèr : « Ala in gouvèrnman i sava pran mon zintéré ! ».

Lé vré ziska zordi, li la pa goumant mon salèr ! Lé vré, mi toush pa zèr siplémantèr vik dann mon boulo, i fé sa pou la po patat ! Lé vré, zalokasion pou mon dé-troi valal la pa tro goumanté. Épi, si i kontinié dan la kriz, sé pa si mon patron i sava pa arash mon kro dann dé-troi zour. Bon ! Alon pa kas la tèt ! Alon pa fé la bou avan la plui ! Alon pozitiv nout fason oir la vi !
Mon kamarad Oguist la di amoin konmsa : « A-a ! Justin, kosa l’ariv atoué pou koz konm sa ? Mi éspèr toué la pa fime in mové zèrb ! Mi pans toué la pa abiz déssi pil plate ! Pars dabitid, ti oi plis la vi an noir k’an roz ».

Moin la fé ali pou répons, moin nana in livré A, é la-dsi Baba, zintéré kat pour san siouplé. Donkalor, i pé konprann mon moné i fé d’ti, mon pla i gonf !
Ayayay ! kosa moin la di la ? Mon do té pankor viré, ala kgouvèrnman la bès lo zintéré déssi lo livré A. Mon dié, ségnièr, Mari, Zozèf, shien mèg ! Ala k’mon pla i dégonf, alak’la vi i vien pli dir pou moin, ala k’mon livré A i arète fé d’ti : l’intéré déssi livré A i artonm dé édmi pou san. Solman !
Ri vandrédi si ou i vé ! dimansh larm va koulé !

 Justin