Sa la pa in kozman bien optimis, mèm si i parl de « rir » dodan. Moin pèrsonèl, mi oi sa konm in n’afèr pésimis pou vréman. Optimis, sé kan ou i di domin lé shoz va vni méyèr. La sé lo kontrèr : sa i vé dir l’avnir lé pa si bèl ké sa. Dann kèl ka i pé dir in n’afèr konmsa ? Kan par ébzanp na in moun ou i èm pa é li viv dan la joi. Ou i pé di : « Sak i ri vantredi, dimansh va pléré », sansa ankor : « Na in zour i apèl domin ! ». I pé di osi nout kozman zordi : « Ri zordi an provizyon ! ». Lé vré ké dan la vi i koné pa zamé, koman domi i s’ra. Souvan dé foi la rou i tourn é out sityasion zordi la pa lo mèm ké sèt domin. An atandan, mi lès azot fé travaye z’ot koko la dsi. Alé ! Ni artrouv pli d’van.