Mézami plizyèr député La Rényon la domande in sorte lindéksassion bande minima sosyo. La rézon lé sinp : sé pars demoune i toush sa dann l’outremer — konm sak i toush toute kalité zalokassion — lé pli pov k’dan La franss é la vi lé pli shèr shé nou. Donk zot la panss lété lojik fé in domande konmsa. Mé zot i atandé pa lo roprézantan gouvèrnman téi sar di azot : pouss pa l’bato, antanssyon la riptir la l’égalité… Zot téi atande téi sava rofize azot sa, mé in bèl massu ziridik konmsa zot téi atande pa.
Mwin lé sir zot va robis lo domand, mé la pa tèlman pou sa mi ékri zordi.

Si mi ékri sé pou di dopi lontan nou la touzour viv dann la riptir l’égalité so kou issi sé nou k’lé viktime la riptir… Pass dsi lo pèryode kolonyal mèm si noré bonpé zafèr pou dir, alon pran dopi la loi 1946 : nou la pran sinkantan pou rash l’égalité sossyal é pou trape sa Elie épi Paul la démissione konm député é anplis ké sa noute parti l’amenn in gran kanpagn bande zansien i rapèl dé sa sirman. Sa lété pa la riptir sa ? É lo gouvèrnman gosh konm droite téi anbarass pa li avèk bande zargiman ziridik..

Si ni arvir dann tan la fé lo RMI, dann promyé tan nou la gingn arienk 80 % é la mète lo tan avan done lo san pour san. Dann tan F. Hollande té prézidan l’égalité lété pankor réalizé vi k’la désside fé in loi dsi l’égalité réèl mé loi-la té apliké par shikète, si tèlman ké Macron la anvoye la loi dingué.. Ziska proshin l’épizode.

Astèr si ni rogarde bien bande voyan o rouz konm lo 50 % zanfan né dann in famiye pov, lo 40 % demoune dsou lo pa d’porte la povrété, lo 116000 pèrsone dann lilétrism, lo nonb rényoné inskri pol-anploi. Arzoute èk sa la kriz noute lékonomi d’prodiksyon, l’égzil pou bande diplomé lédikassion nassyonal. Si ni armète la dsi la diférans rante trètman bande fonksyonèr, épi lo privé, lékonomi d’kontoir… é ni pouré ankor razoute ankor dsu la list. Toussa-la la pa la riptir l’égalité sa. Nou lé égal pétète mé nou lé moin égal ké d’ot…

Alor la riptir l’égalité nou lé touzour an plin d’dan é la pa domin sa v’arété. Mèrsi pou la lésson dsu la riptir d’égalité, pars nout pèp i koné sa pratikman pars sa i zoué pa dann nout favèr — pa ditou.

Gouvèrnman La franss arète fé pran anou blan pou noir, makaroni pou la bouji — a bon ékoutèr salu !

Justin