Donk, Ben Laden i sort pass l’ote koté la vi, avèk in séryé kou d’min bann militèr amérikin.
Donk, in pé la bate tanbour solman ! In pé la bate la min ! In pé la kriy zot kolèr ! Na mèm in jenn marmay la di konmsa, si in Ben Laden lé mor, san va lévé !
Déssi in grann shène télé la Frans, la fé in gran sobatkoz avèk in bann z’invité bien koni, pa par moin, mé dann zot famiy asuréman. Donk, lo lanimatèr la domann in madam zournalist, si Ben Laden mor, lo monn té pa in pé pli méyèr. Lo tantine la trok in pé langaj épi la fini par dir oui ! Lété lo mo pou fini.
Moin, pou mon par, mi domann amoin ankor zordi kossa sa i vé dir. Sèl z’afèr mi konpran, sé k’pou lo madam, lo boug mor té i apartien bann moun méshan. Alor, mi domann kossa noré di si té G.W. Bush l’avé anval son kiyèr. Pétète noré di lo moun lété so kou issi in pé moin bon ? L’èr-la, moin l’apré domandé koman in pé i klass l’imanité.
A ! Moin la obli in n’afèr. Dann la konvèrsasion banna, té i rovien touzour le mo "téroris !". L’èr-la, moin la parti rode dann diksyonèr, é moin la trouv, sé ansèrv la vyolans pou an avoir in rézilta politik. Donk, Ben Laden té in téroris, mé G.W. Bush galman… épi in bon pé bann dirizan lé konmsa, vi ké zot i ansèrv in vyolans i dépass la doz. Nana donk téroris robèl, mé nana ossi lo téroris bann z’Etat. Poitan, té i anparl solman Ben Laden konm téroris ! Mi sipoz sé pou fé parète ali pli noir, pou in pé aparète pli blan, ou solon lo ka, moin gri.
Moin pèrsonèl, moin na dann koko in shanson Renaud avèk Axelle Red. Zot la fé sa zis in koup de tan apré lo 11 séktanm 2001, é la-dan zot i konpar l’atanta kont bann tour zimèl avèk bann vilaz bonbardé, brilé, détrui avèk tout demoun dedan, fanm, vyé moun épi zanfan, é sanm pou moin, zot i oi pa in gran diférans. A moin ké pou bann shanpion lidéolozi dominante, in l’Etat rish, kapitalist épi oksidantal na lo droi lé zot na poin !

 Justin