Moin na konm l’idé na in pé i pran dmoun pou zouèr kart ! I kroi ni konpran pa arien ! I pans nou lé nil dann péi la nilité ! Solman, zot i koné pa nou ossi, déyèr nout télé, nou l’apré kalkil azot... Mi an souvien méssié Fillon, in zour, la fé in kozman dan la Corse épi la di karéman : la France lé an fayite, èl lé an sésasionn pèyman... Posh lo péi na trou ! Mi ansouvien lo prézidan li ossi la di lo mèm zafèr, é pa arienk in foi ankor...
D’in kou gouvèrnaye èk gouvèrnman i sort trouv troi miliar pou ashète in bank la fé lintéréssan avèk larzan la pa li la-ba dann l’Amérik, épi vinn-dé miliar pou tienbo le rin déssèrtin lantropriz. Ala k’zot i di l’État nana zaksion dann lantropriz épi li ankèss dividann an poundiak, in ta èk in paké... Donkalor, li nana lo pourkoi an sifizans.
Alor, oussa i lé la vérité : l’État lé rish konm Crésus, ou bien li lé o flan ? Li na la fèss an or, ou bien la fèss Grandyab ? Lo péi lé dan lokissité, ou bien li dor déssi matla larzan ? Zot l’apré dépans konm k’i fo ou bien gaspiyé ? Zot i azi an bon pèr d’famiy sansa an fou-fou ? Zot lé rézonab sansa rézodiab ?

Justin