Biensir li pé fé lo fyèr pars zétazini sé in grann puissans é mèm li prétan d’ète lo promyé péi pou son rishèss nassyonal é li lé paré pou rogoumante lékstrakssion bann zénèrji sal konm lo pétrol pars i paré lo péi néna in gran rézèrv bann zénèrzi konmsa. An pliss ké sa, li di li kroi pal o réshofman klimatik é pou li sé pa laktivité imène ké la dérèg lo klima. Néna demoune i panss konmsa mé sa i anpèsh pa la natir l’apré pran in gran shok.

Déssèrtin péi va disparète dsou la mèr é bann réfijyé klimatik i tarde pa pou déval in pé partou oussa malorèzman bonpé péi la pa bézoin azot mèm si l’avé bézoin travaye o blak osinonsa otroman pou anrishi lo péi… Pou bien rékonpanss azot lo Trump la désside mète pliss dis milyon bann migran déor épi. Lé bon kan ou lé for ! Oula mèm pa bézoin tienbo konte la mizèr limanité. Sèl soussi pou ou sé k’bann milyardèr i anrishi azot plizanpliss.

Mézami zot va dir amwin sa i rogarde pa La Rényon si La Franss i ède anou fèr fass noute problèm lanvironeman. Mé kissa i kroi ankor dann la kapassité d’La Franss. Kissa i kroi La Franss va règ noute problèm lanvironeman… Mé pétète zot i panss nou na pwin problèmlanvironeman ? Kossa i spass laba létan Sin-Loui ? Kossa i spass dopi Boi Rouz ziska Sinte roz avèk la kote apré rokilé-rokilé mèm ?

Poitan la pan ou l’otèr si toussa i ariv. La pan ou lotèr si la séshrèss épi lof é sho l’apré poike anou, la pan ou l’otèr si noute bann zanfan i anpé pi avèk la shalèr dan la klass ? La Franss va ède anou-oir konm él i ède bien avèk siklone, glissman d’térin, Mayotte ! Mèm son téritoir nassyonal i anpé pi ! Si tan tèlman i fo li ède son bann milyardèr.

Alor mézami koman ni anpar bann risk natirèl ? Koman ni protèz noute bann téroir ? Koman ni fé fass lo réshofman loséan ? Sa lé vré pou nou é pou sak na pwin tro lo moiyin koméla. Fransh vérité nou téi konte pa dsi lamérik, mé zordi opliss i sava opliss ni oi dsi La Franss konte pa dsi.

A bon antandèr salu !

Justin