Matante Zélida la ékrir Justin :

Mon shèr nové, mon spès salté, rouj-de-fon dovan l’étèrnité,
Akoz fé sinp kan i pé fèr konpliké ? Sé sak mi di dan mon kèr dopi ké mi antann tout lo wati-watia l’apré fé dsi la késtyonn rokin. Mi pans, demoun lontan té pli rézonab. Zot té i rant pa dan lo pou bényé l’androi na poin résif, pars so l’androi-la, rokin té propriyétèr. Mèm par isi d’brizan, kan la mèr té mové, demoun té i rant pa non pli. Pou kosa ? Pars rokin i ansèrv la pas kanot pou zot rant par isi lo résif. Mé biensir, in pé i pans zot lé pli for ké la natir. Zot i pans zot i pé alé surf dann roulo, alé naz o-larj, pran pa prékosyon plis ké sa. L’èr-la, kan i ariv malèr, zot i mèt a kriy pli for ké toulmoun. Zot i trèt ziska l’administrasyon konm kriminèl. Moin la vi sa dann télé.... Boudikont, si zot i mèt zot vi dann danzé, kisa la fot ? Pa la fot lé z’ot bien sir. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, si ou té i égzis pa, n’ar té fali invant aou...
Fransh vérité, si l’imanité dépi dann tan l’om de Kromanion té i fé konm ou i di, demoun nar pa koni granshoz dsi la tèr épi dan la mèr, dan l’éspas, étsétéra, la ké lo ra... Mi pans osi, demoun n’ar té fine afayi, fine mol vèy pa koman. Matant, l’om la touzour pran lo risk, kisoi pou dékouvèr késhoz pa koni, kisoi pou fé in éspor, kisoi ankor pou alé rod bann rishès li té i koné pa ankor. Sa sé nout natir k’i vé sa !
Solman i vo myé pran in risk kalkilé. Mé dann in ka konm sak ni koné, kosa i lé in risk kalkilé ? Kisa la fine kalkil so risk-la ? Pou l’instan, sanm pou moin, nou lé dépasé, mé lo zour va rivé nou va konèt rokin, son manyèr fé, son manyèr viv. Nou va konèt pou kosa li atak é pou kosa tazantan li atak pa. Zordi lé tro bonèr pou di tèl, tèl solisyon lé bon, tèl ot lé pa bon. I fo rodé, mé rodé vréman : pa an pityé, pa an sanblan. I fo an avoir lo moiyin. Pa konm i fé koméla ! Mi trouv i tard pou l’instan. Tok ! Pran sa pou toi !

Justin