Zot y koné pa so gro pié d’bwa la ? Si zot na lokazion pass sin dni, pa loin champ fléri, dessi lo boulevard Sid, zot va war toute lo chemin lé agrémenté ek pié badamié. Y fo dir ke sé in zoli plante pou d’vré ! En plis ke sa li fé in bonpé lombraze et sa lé bon pou bande domoun y marche à ter là. Pé tète pou sa mèm la plante à li là.

Mé antasion ! Li serve pa soleman pou fé zoli. Y paré avan, bande momon té y en serve son fèille pou tié lo ver. Zot i koné, dann tan lontan, marmay lavé lo ver bandé é té i pé mor ek sa. En Inde osi li lé itilizé kom in zerbaze, in médicaman si ou i vé.

É pi i fo pa oubli lo méyèr, son zamande. kan son frui lé rouze, la li lé mir é i pé manze à li, son goût lé in pé ake, mé lé bon. Aprè kan li lé sek, i fo kasse lo coke, épi dédan nora son zamande. In nafèr lé bon pou d’vré ! Domaze marmaille koméla y koné pi trésor là.

Alé ni artrouv !