Accueil > Chroniques > Oté
Rissès nout péï : Lo sèl
jeudi 25 mai 2023, par
Dann tan lontan, nout bann anciens té i fé lo sèl ek lo d’mer. Bann marmaye té sa trap dlo dmèr dann zamponn, é kan té fini transforme en sèl, zot té i sava vann sa bann passagé pti trin.
Aprè sa, DUSSAC la fé son lisine do sèl, La ba, Sin Lé. La fini par nome lo landroi « La Pointe au Sel ». Avan sa, tèr la té i appèl « la pointe des Bretons ». Dann tan la, sa té in produi importan, parse ké navé poin frigidèr et do sèl té i ansèrve bonpé pou conserve la viann ek poisson.
Dann tan lambargo, pandan la guère 39-45, La Rénion té produi 250 tonnes do sèl par an ! Mé dèk la porte la rouvèr, la prodiksion péï la pa tienbo. Zamé nou la pi niabou fé in tèl prodiksion.
Na ankor in trass La Pointe au Sel. Astèr na in misé. Ou pé war larivé d’lo mer dann bann gran caré béton, en plin solèye. Ou pé war koman i fé pou gagne désèl. Lé pa kompliké, mé kom toute zafèr, i fo travaye dir pou rékolté.
Zordi lo misé y produi touzour son sèl, et dopi 2017 na in prodiksion di koté d’Pierre Fonds, ki fé 50 tonnes par an.
Pé tèt in zour nou va artrouv moyen produi nout kantité do sèl par nou mèm, a koz pa ? Sa va donn travay kréole. Pé tèt mèm ke nou nora asé pou arvann dote péï ! A koz pa ?
