Vant-yèr, moin t’apré rogard dann télé in bann moun instruyé apré diskit dosi lo plan mésyé Fillon, soi-dizan pou fé z’ékonomi, soi-dizan pou bann l’azans notasyon i abès pa lo note la Frans. Inn-dé i di, i fo diminyé bann dépans. Inn-dé i di, i fo rogoumant bann rosèt. Désèrtin i prétan dir, i fo fé lé dé an mèm tan. L’èr-la, i rofé l’istoir, i fé roprosh inn-a-l’ote, i tourn, i détourn, i rotourn lé shoz… si tantèlman ou na l’inprésyon l’apré tash moiyin roul demoun dan la farine. Bien antandi, késtyonn la mantri, sanm pou moin, bann droit lé pli for, sré konm k’i diré zot métyé.

Momandoné, na inn i di, i sort fé in plan l’ostérité ; La pankor pas troi moi, i arfé in n’ot ; Sirman lo proshin la pa tro loin. Pou koué ? D’apré sak i paré, sé pou nyabou boush in pé lé zyé bann z’azans notasyon, konmsa la Frans nana touzour son “troi” A épi li gingn anprète l’arzan pou pa tro shèr. Na in n’ot i di konmsa, sa la pa in bon tik-tak vi k’sak i fo, sé in gran réform z’inpo, pou tir plis dan la posh sak nana son pourkoi, é moins dan la posh sak na moins. In boug, moin la fine kalkil ali, sa in siportèr Sarkozy, i di, li pans pa lé l’èr pou fé in gran réform épi li arzout : « Kan la rou i pèrs, la pa bézoin shanj toutsuit la shanm d’èr, i vo myé aplik inn dé ristine pou komansé ! ».

Sa la fé pans amoin, dann tan lontan, kan vélo té i pèrs, té falé oir lo nonm plak ristine dési. Pli pir, kan lo l’anvlop té pi bon, in pé té i mèt bann plak ann-dan pou évit k’i ropèrs. Bann plak-la, dann tan té i apèl sa parékla. Sa té i marsh in pé d’tan, mé in zour té i fo shanj lo shanm d’èr épi lo l’anvlop. Mé sa té in z’istoir vélo pou dmoun la posh té plate, é mi pans pa i fo règl lé z’afèr in péi konmsa. Otroman, afors ristine, afors parékla, in zour tout i pèt é ou i tonm dann kanal, é lé ankor pli pir kan sé lo bidzé in péi : ristine avèk parékla, sanm pou moin, sa i marsh pa lontan sa !

 Justin