Mézami lé possib zot i koné pa lo kozman « tourn son fime » pars mi panss sa in vyé léspréssion. Etan pti mèm étan jenn mwin téi antann sa souvan ziska k’in zour li la disparète — demoune téi ansèrv pi ali é lé possib d’ote kalité zéspréssion la pran son plass.

Dèrnyé foi mwin la antann sa, sé kan in momon in moune divorssé téi di an parlan d’son garsson la di : « Trakass pa pou li, li gingn tourn son fime ! ». Mi panss èl téi vé dir li néna son pti vi privé. Zot i konpran sak mi di la !

Si ni rovien dsi lo kozman d’dépar : tourn son fime mi panss sa i vé dir « kashyète son jé ». Mi kite azot rofléshi la dsi é ni roitrouv pli d’van, sipétadyé.

Justin