Matant Zélida la ékrir Justin

Mon shèr nové, mon spèss salté, rouj-de-fon dopi l’étèrnité, si mi suiv azot bien épi la fasson zot lé alarmé, i diré promyé fwoi siklone i suiv inn apré l’ot a la ké lélé, promyé foi, si mi kroi azot la plui i tonm a kassé-brizé par la fote lo soidizan réshofman klimatik, promyé fwa loraze i pète a krazé. Alé oir sanm pou mwin, si mi rapèl bien lo tan passé, l’avé déssèrtènn pèryod téi fé sho, d’ot pèryod la plui téi tonm, d’ote pèryod la séshrèss, d’ote pèryode avèk in takon siklone épi d’ote l’avé pwin siklone ditou. Donk, kossa la shanjé ? Mwin pèrsonèl mi wa pa é siouplé alon lèss bondyé fé son travaye pars na pwin pèrsone npou ranplass ali. Tok ! Pran sa pou toi !

Justin la fé pou répons :

Mon vyé matant i koz toultan la boush rouvèr, i étone pa mwin d’ou in kalité kozman konmsa. Si mi fé lo rézimé sak ou l’apré di : sé Bondyé i komann la natir épi bann rouj-de-fon lé ziss kapab krétik a tor é an travèr pou in oui, pou in non. San amène dan lo déba kékshoze sèryé..

Poitan matant vi woi ou mèm dovan oute zyé déga lé z’onm l’apré fé dsi la tèr é pa arien déor, issi anndan ossi, shé nou. Di amwoin matant si solon ou lé z’onm lé pou arien dann la fasson la natir la dégradé. Di amwoin galman lé z’onm lé pou arien dann fasson in bonpé zoizo épi in bonpé poisson la disparète. Si in zour na pi tang pou shassé, na pi guèp pou rodé, na pi kapissin karème pou péshé d’apré ou sé Bondyé l’otèr sansa sé l’onm ?

Si in zour na pi la glass dsi pol nor épi na tro la glass dsi pol sid, si la otèr la mèr la monté papa vèye pa koman, lé zonm sar pou arien. Si ou i woi in torti d’mèr l’apré toufé avèk sashé plastik dann la mèr, lo mond lé pou arien : mèm sak la fé lo sak, épi sak la zète dan la mèr. nous ré pou arien nou alor ?

Matant bann saz in pé tout péi la di sak i fo pa fèr pou pa dégrade vitman la natir é spandan zot lé pa ékouté. Konm demoun i di matant : « Rogré i vien apré la mor ! ». Rogré l’imanité va vni kan sar tro tar. Tok ! Pran sa pou ou !