- inn Band péi l’Afrik sanm pou mwin i ropran in pé par zot mèm bande gran problème zot néna. I konte pa dsu bato tonton pou travèrs la rivyèr.
- Dézyèmman : bande prète-larzan i konsèrn lo dévlopman lagrikiltir, lénèrzi épi lo dévlopman tou kour ;
- Troizyèmman : bande péi l’Afrik i doi protèz azot par rapor bande problèm égzozène épi bande kontrokou zot i rossoi konm par ébzanp la guèr l’Ukraine.

Si néna in bon priz konsyans tan-myé pars l’Afrik la bien bézoin in n’afèr konmsa mé sirtou l’Afrik i soufèr tro kou kalpyé bande péi rish.
Mé kan mwin la lir bande zartik-la mwin la di, la pa arienk l’Afrik la bézoin in n’afèr konmsa. Pé s’fèr toute péi la bézoin sa é bande péi nout réjyon loséan indien ossi la bézoin sa. La Rényon la bézoin sa é sa lé sir.

I fo dir néna lontan nou la fine konprande kékshoz konmsa pars shak foi néna in kriz nou pou arien dodan, nou néna difikilté, kissoi i manke anou marshandiz, kissoi lo bande pri i rogoumante dann lé dé ka ni suporte lé konsékans.
Mi rapèl in fraz listorien Prosper eve, kan li di : « i fo pa lèss nout garde-manjé vidé, i fo ranpli ali ». Mi rapèl pou sak i ansouvien pa bande plan nout parti la fé dopi in bon boute tan-in sorte mète an gard kont la mémoir fèb lo bande zotorité d’léta. Mwin la bien ékoute sak lo prézidan la chanblagrikiltir i di, konm sak le prézidan La CGPER i signal é pa arienk in kou é sa i sava dann mèm sans nout rovandikassion.

Mézami ni koné sa é bande zansien néna sa dann zot mémoir, mé ni oi pa lé shoz avanss an gran, avans in pé konm k’i fo. I fo kroir ni atande bann nouvo zévènman i mank ar pa d’arivé késtyon d’gingn rogré.
Mé konm i di, rogré i vien apré la mor — a bon ékoutèr, salu.

Justin