Mi koné pa si zot la fine antann zistoir-la. Mi pans sa in zistoir vré. Donk ala li la : i paré bann z’Amérikin la fé test dann lékol matèrnel. La done shak marmay in pastiy, é la di azot konm de koi : "Zot i pé manz tout-suite si zot i vé, mé si zot i aspèr in démi-èr, va donn azot dé !". Dan la bann, nana in pé la manz lo pastiy vitman, in pé la lité pou pa manz ali toute suite é zot la gingné. Lo fin mo sé kan la suiv lo bann marmay, la romark sak la myé réissi dan la vi, sé sak la pa manz zot pastiy an dé tan-troi mouvman, sak la nyabou éspéré.

Pou kossa mi rakonte so z’afèr-la ? Pars, solon moin, tazantan lé bon rapèl inn-dé kékshoz, mi pans lé valab pou in moun, pou in lantropriz, pou in koléktivité galman. Moin lé sir zot lé dakor avèk moin pou inn pèrsone, pou in l’antropriz galman. Bin pou in koléktivté alor ? In koléktivité ossi i doi fé l’invèstisman, sansa li avans pa. Si li fé pa, demoun i pé ète kontan avèk lo koléktivité in pé d’tan, mé oplis lo tan va passé, oplis sar difisil pou kontante demoun, pars nora l’inprésyon la koléktivité i fé pa aryin, mèm si i dépans san konté. Mèm, demoun va fini par roproshé, par di, si lo résponsab l’avé plass lo larzan byin konm k’i fo dann bann bon projé k’i prépar byin l’avnir, la koléktivité nora été pli avansé.

Ziska koméla, la Réjyon la fé in bon pé z’invèstisman, la fé in bann gran projé pou byin prépar l’avnir. Tousa zot i komans konète. Mé si i tourn le do avèk la politik Mario Hoarau, sète Pierre Lagourgue sansa Camille Sudre ou byin Margie Sudre, Paul Vergès... Si i dépans solman san konté konm la fine komanssé dépi dé-troi moi, si i dévir lo do avèk lo dévlopman dirab, ousa nou sar randi dann in pé d’tan ? Olèrk avansé, nou va rokilé !

Justin