Pou kossa ?

Dabor pars sanb pou mwin nout manzé i fé parti noute kiltir é i pé pa parl nout kiltir san parl nout manzé. Pa arienk sa biensir, mé sa konm zarboutan pou nout pèp rényoné. Kouék sré in pèp san son kiltir ? Sa i méritré in sobatkoz mé la pa l’èr, la pa la minite ni sava angaj in déba konmsa. Mé shakinn i pé si li vé fé tourn sa dann son tète mil é mil foi pou anrishi la konéssans nout pèp épi noute konéssans de nou, o boudikonte.

Poitan zot i koné, momandoné issi dann nout péi bonpé téi anparl pa la kiltir rényonèz, souvan dé foi téi anparl arienk nout folklor, téi di pa non pli la lang pou noute lang kréol La Rényon, té rar antande parl nout litératir, té rar ankor i kalifyé konm zartist toute nout zartist rényoné. Nout limajinèr ? sorte aou la. Nout filozofi ? Dégaj la voi. Nout lidantité ? Néna arienk kominiss i koz konmsa !

Noré la plass ékri in gran bétizyé la dsu si tèlman toute bande mo nou téi anploye lété fé pou abèss anou :nou l’avé poin téate nou l’avé scénète, nou l’avé poin la lang nou l’avé parlé, nou l’avé poin tradission mé sipèrstission, noute médssine- in kantité tizane sinp. Nou l’avé poin, noute limazinèr,parl pi, nout listoir té pa in listoir...Mi arète la mé mi di azot franshman kan nou téi parl de nou nou téi pass nout tan ansèrv bande mo k’i abèss plito ké bande mo k’i rolèv.

Mé o fète, nou té apré anparl manzé La Rényon é zordi toute demoune i rokoné noute kuizine sé in bon kuizine é déssèrtin pla ni fé talèr sar dann prèss-bouk bande gran kizinyé, dann ménu bande gran réstoran.Mé antanssion, la pa bézoin – konm i di – rovizite ali pars li lé la é bien la, é sé la kréolizassion la mète ali anlèr é la plipar d’tan noute kuizine sé in kuizine popilèr. Bande pla orizinal, bande zépiss nout zansète la améné, noute matyèr promyèr sé nou la ansèrv de li, lo gou oté ! La pa dsu la tab bande rish la parti rode sa mé dann la kuizine lo pèp.

Mwin la parl in l’avanssé é an mèm tan in rotour dsu lo passé : Na poin arien lé kontradiktoir ladan.

A bon ékoutèr, salu !