Dalone, dalon, shèr zami lèktèr zoinal Témoignaz , zordi mi vé komans rakont azot zistoir moin la mark lo tit anlèr-la. Biensir sa la pa zistoir Tizan Grandyab, ni Lyèv avèk Torti, anfin sa la pa in zistoir La Rényon. Mé o fète, pou moin, bann zistoir-kont lézann-d’apré moin sa i tonm dann patrimoine l’imanité-é si sak mi pans lé vré bann kont épi bann lézann i mérite ète koni par tout zanfan l’imanité donk bann zanfan La Rényon galman é si ni vé bann zanfan nout péi i koné zistoir-la i fo mark sa dann zoinal, épi lir, fé lir ; mark sa dann disk dir nout mémoir é fé la pass rant zénérasyon. Inportan sa !

L’avé inn foi pou inn bone foi mésyé lo foi la manz son foi avèk in grinnsèl.
Ronar lo goupil l’avé fain zour-la. Dopi la vèye, mèm l’avan-vèye li l’avé pa mète dann son bouzaron-son vant - in manzé in pé konsékan. Ronar ? Sa i manz poulé, sansa poisson, sansa in pti zibyé li téi pé trouvé, défoi volé, défoi shapardé, dann kuizine demoun, dann poulayé, sansa tout landroi demoun lé antouré avèk zanimo. Ronar ? Sa la poin sa isi La Rényon mé i fé pa arien pars sa i anpèsh pa nou suiv lo listoir moin la lir dann liv, sansa moin la antann demoun apré rakonté, i pé z’ète galman dann bann zoinal pou marmaye konm zoinal Vaillant moin la gingn la shans lir in bann zané d’ran kan moin lété jenn-kaziman pti marmaye é mi pans dann zoinal – la moin la ramass bann rudiman la kiltir lé touzour dann mon tète ziska zordi. Kan ou néna bone mémoir sa lé konmsa !

Kriké ! Kraké ! Kriké Mésyé ! Kraké Madam !
Donk Ronar i tourn i vir i rode mèm kékshoz pou manzé. Li sava dann marshé mé laba demoun I foute ali kou d’boi. Li rant dann bann fèrm, mé laba bann bèl bèl shien I fons dsi li é si li téi fé pa lo vif, nora tir in boute la vyann dosi li. Li sava koté basin poisson, mé arien afèr, bann poisson I bash ali. A ! si li l’avé in filé konm bann péshèr poisson néna. Sa I trap poisson an kantité, in pé tout kalité, tout grosèr, tout koulèr. Sa I san bon, sa i san fré, konm in l’invitasyon d’ manzé. Ronar I sèye alé shapard in pé dann panyé poisson, mé demoun I shaboul ali kou d’galé é si li l’avé pa fé lo vif, li nora té fine ramass in valval dann koko. Lansé an fors, sa I pé fé déga mèm dann koko in goupil I apèl Ronar.
An distans Ronar i rogard bann péshèr apré sharj poisson dann panyé trésés épi mète dann sharète. Kan li oi sa li la pli fain ankor : son bav I koul tousèl é li pans li va mor si li trouv pa in moiyin pou ranpli son vant. Li kalkil, li kalkil mèm koman I fo fé pou li tir son par ladan : pa tout mé zis sak I fo, pou tyé la fain épi pou amen in pé la kaz son madam, san obliye son dé pti sirman la fain l’apré travaye azot é tété zot momon I pé pi kontant azot san pour san la grosèr zot la fine arrive.
Ronar dann son kèr i pans banna I sava kol shomin pou zot alé ziska dann vilaz pou vann z’ot priz épi li pans dann la kroizé sar bon landroi pou li tir son par dann panyé.

Promyé morso la fini-mèrkrodi proshin zot va loir dézyèm bout.