Lété tan k’i fé in n’afèr konmsa sirtou ké bande marmaye i paré la yème sa, épi alon pa obliye sé la loi k’i prévoi in n’afère konmsa..

Donk ni pé di bravo.

Mé oila toute marshandiz té i sorte dann bande grande sirfass é d’apé lo létikète l’avé poin arien téi sorte La Rényon. Toute téi sorte déor é la fé sa avan prépare in filyère manzé bio pou okipe lo kréno.

Pou kossa ?

Pars néna in n’afèr ni doi pa obliyé. Pou in produi ète bien fré, garde son bon gou, i fo pa li la fine fé troi foi lo tour di monde avan d’ariv dann zassyète lo konssomatère. Alor sanm pou mwin lo bande produi lété pa vréman bio. Mé la pa solman in késtyon d’gou, in késtyon d’vitamine épi dsèl minéral, sé ossi in késtyon d’inskripssyon dann lo milyé natirèl bande konsomatère é opliss li sorte loin, opliss li lé étranj par raporte lo konssomatèreé son lanvironeman.

Arzoute avèk sa nou demoune bande zil dann noute milyé tropikal, ni soufère la konkiranss bande marshandize déor é nou lé sir, si i komanss konmsa, sar ankor in séktèr la konsomassion okipé par la dinamik lo bande kontoir… Alor mi fé in apèl léspri patriotik noute bande konpatriyote pou dir azot manze bio lé bien, mé manz produi bande prodiktèr noute péi la fé avèk zot travaye sa lé méyèr pou nou. Ala in sèktèr i pé pèrmète anou doi domine linportassion é pa lèss ali domine anou.

Sansa sé in trayizon par raporte noute bande prodiktère épi noute bande prodikssyon, in vyolassion d’la loi-san obliye la violassion lintéré noute péi La Rényon.

Justin