L’avé pa in sèl sours énèrzétik mé plizyèr : l’avé lénèrji dolo, sète lo sharbon épi gazoil, lénèrji lo van, épi ankor sak i apèl lénèrji tèrmik. Mé lété pa arienk sa vi ké l’avé dévlope bande shof-lo solère — pliss san mil momandoné — épi la klime avèk lo d’mèr.

Si tèlman ké nou l’avé léspoir trape nout lotonomi énèrjétik. Pou fé kossa ? Sinploman arète inporte lénèrji an kantité, ékonomiz noute larzan épi dévlope lanploi. Nou té kontan dsa nou, é noré falu nou sé in bande zinbéssil pou pa ète kontan avèk sa.

Poitan linbéssilité la pa sak i mank issi La Rényon é toute in kantité sabotèr la fé in lalyanss pou kass la zèle noute lotonomi énèrjétik : gouvèrnman-li, la droite li, l’ultra gosh li, soidizan défansèr l’anvironeman, soidizan défansèr l’EDF dann tan. Toussa pou kass la marsh an avan dann noute péi.

Antouléka, sak i dové arivé l’arivé, la kass par pyèss noute plan pou lotonomi énèrjétik. Astèr, in n’afèr partou téi anvi an ou, lété pi la pou amontre lo savoir fèr rényoné pars si la kass noute gran bon an avan, la pa kass noute savoir fèr. Mé antanssyon, antanssyon kou d’kongn !
Lo rotar wi pran momandoné ou lé zamé sir ratrape ali pli d’van.

Justin