Médam, Méssyé, la Sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami « roul kari dsou l’ri » i di ossi « tourn kari sou l’ri » é zot i oi bien néna kékshoz k’i klosh pa ladan. Pou kossa ? Pars kan in bon kréol i tir son pla d’manjé, li komanss par mète lo ri, épizapré lo grin, aprésa lo kari prinssipal é an fin d’konte lo rougaye. Wala normalman l’ord dé shoz é si i fé konm lé marké dann lo patoi, sa i vé dir wi fé toute alanvèr, dovan déyèr.

Sa lé valab pou lo manzé mé galman dan la vi é ni pé dir, si i fé konmsa, i fé toute an dépi d’lo bon sanss é sa sé in kékshoz lé pa bon é i fo bien rofléshi la dsu é zot va konprande pou kossa sa lé inportan.

Alé ! Ni kite anou pou zordi é ni artrouv pli d’van, sipétadyé.