Sirman pa in n’afèr normal pars normalman kan in moune i tir son manzé li mète dori an promyé épizapré lo grin –kari sansa kari sinploman.Donk lo kari lé dsu é lo ri lé dsou.Dann noute kozman lo ri lé dsu é kari lé dsou…donk sa la pa in n’afèr normal ditou.

Anpliss dé sa, dann tan vash mèg, si l’avé dori, kari té rar é déssèrtin malin téi sèrv azot bien an kari é pou pa fé oir téi rokouv in pé lo kari avèk do ri tèlman ké dann bann famiye nonbrèz sak i sèrv an dèrnyé téi gingn trépé an kari é téi di mèm dèrnyé i goute la soss pars sé la soss k’i rèss.

Astèr ni konpran bien roul demoune kari sou d’ri sa la pa kékshoz de bien é si ni obliye in pé lo ri avèk lo kari é si ni oi noute kozman konm in prinssip sossyal, nou lé dann in ka lé kondanab pars roul in moune dan la farine sa lé pa bien ditou

Mi panss sa i vé dir vol in moune, éskroke ali, tronp ali, fé prann ali po d’shanm pou pla kouvèr, makaroni pou la bouji é ni konpran bien dann la sossyété sé kan kélk’in i zoué in mové tour lé zot é sa i fé parti bann shoz sak lé kondanab.

Alé ! Mi kite azot rofléshir la dsi é ni retrouv pli dvan sipétadyé.

Justin