Médame, zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, mi panss zot i koné kozman-la, osinonsa zot la fine antande ali souvan dé foi. Mèm zordi pétète zot la antande sa é sirman dann la voi lo moune la di, sa téi pass pa pou in konpliman antouléka sa téi donn pa l’èr.

Poukoué ? Pars dann l’ord normal dé shoze, i mète lo ri, épi lo grin aprésa i mète lo kari, é mète kari, rogaye épi toute bande pti séréal si néna. Sou d’ri sa la pa vréman in bone idé d’mète lo kari : sé konmsi wi fé lé shoze alanvèr, an dépi d’lo bon sanss. Antanssion, si zot i fé konm mwin tazantan, é zot i mète lo manzé dann in ord anormal ébin si zot lé a koté d’in tradisyonalis la kilti kréol, lé sir zot i sava gingn in boush ta guèl.

Lé konm kafé, avèk do sik : i paré sé in lérézi ké d’mète kafé avan mète dosik. Néna défoi mwin mèm mi obliye mé lé a rogardé dan lo kode politèss la kiltir kréol… Astèr lé vré dann tan la dizète, sansa si ou sé in goulipia téi ariv in pé téi kahyète morso la vyande dann ri pou gingn pliss kari. Mi panss dann tan « fain d’anfanss », in roman Aksèl Gauvin [1] sa téi ariv souvan.. Zordi pétète in pé moinss.

Antouléka, sak mwin lé sir sé k’i fo zamé fé lé shoze dann dézord pars aprésa wi koné pi oussa wi lé. Alor, mi kite azot rofléshi la dsi é ni artrouv pli d’van. Sipétadyé.