Mézami, si zot konm moin, ni pans bann tète prop ladministrasyon la tète zistoman i tourn pa tro ron, i fo ni rofé nout zizman pars, fransh véroité, banna i travaye la tète sa. La prèv ? Dopi la kriz kovid la komansé i fé tou lé zour shak zour in bilan. Pou dir vré la pa in bilan tro fortish pars néna si tèlman varyasion rant la vèye, lo landmin épi lo zour d’avan avèk lo zour d’apré ou téi pé domandé kèl léspri tort téi kalkil sa.

Astèr va shanjé é sak téi kont la dsi pou zoué tirsé, sansa loto, zot va déshanté pars va donn in kont par somenn. Fini lo kont zoinalyé.fini konète lo nonm la définté zour a landmin. Donk zot i oi bann sak i gouvèrn anou néna lintélizans visé avèk lo kor... Dousman, bouj pal o bato ? Lé vré konm mi pans la plipar d’tan kan in moun i sort la zéoréyi pou vni travaye isi, la plipar d’tan la pa la flèr d’poi konm ma mère téi di dann tan èl lété dann lo mond par isi pou alé daknn l’ot.

Astèr sak i sava éspasé sé in n’ot shoz. Zot I koné koman d’moun I lé isi, demoun I yèm amontr zot I koné é pou sa zot i domann In kou d’min demoun zot I koné. Sé l’èr ké désèrtin i dékouv zot néna zami é kamarad dann l’ARS, dann l’opital, mèm la proféktir, laba zilo, in pé I koné mèm demoun an Frans. San konté sak la vi l’om, la vi l’om, la vi l’ours… Sé dir azot si zistoir mantèr va komans sirkilé, si bann shif fantézi I sava pa sirkil boush-a-orèye ankor pli rapidman ké lo viris.. Tousa sé pou kass lé kui mé in n’afèr sèryé kant mèm :

Moin la antann lo mèr Sin-Dni apré di èl I konpran pa pou kosa I prannn arpi prékosyon pou sort Mayotte pou vni isi alé oir va kontinyé pou sort La frans-mèm an zone rouj-pou vni isi.. Moin lé a d’mandé si an - o-lyé banna la pa apré désid fout anou vréman dann traka, nou la pankor koni. Dopi l’rouz pou alé o rouz sar pi parèye pou sort lo rouz pou alé lo rouz. Ousa i lé l’égalité alor ? Apré di amoin konmsa bann tète zèf ladministrasyon i fonksyone pa.I fonksyone li, mé d’in drol de manyèr.