Kan in péi lé dann difikilté, shak katsou k’i dépans i doi z’ète bien dépansé. Larzan i doi ansèrv sirtou pou fé in bann kékshoz konsékan. Konsèy réjyonal dann tan Paul Vèrgès té prézidan l’avé bien konprann in prinsip konmsa. Sanm pou moin, Konsèy zénéral avèk madam Dindar la aplik galman so règ-konduite la.

La pa sak l’État i fé malérèzman, vi k’li raz la pinte déssi bann z’afèr lé inportan pou lo péi. In légzanp ? Si ou i raz la pinte déssi l’édikasyon nasyonal, sé l’avnir ou i sakrifyé. In n’ot légzanp, kan ou i raz la pinte déssi la roshèsh. Arzout èk sa kan ou i diminyé larzan nana dan la kès lo péi... konm kan ou i aplik lo boukliyé fiskal, pou lo péi, sa sé larzan zété.

La pa non pli lo ka la Réjyon avèk Didier Robert. In légzanp ? Kan sé l’Etat ki doi okip la kontinuité téritoryal, é kan ou i tir larzan dan la kèss la Réjyon pou sa, ou na tor pars so larzan-la va manké pou fé d’ot z’afèr bien nésésèr. In n’ot légzanp ? Kan ou i roganiz in gran batkaré dann l’Australie, ké sa i koute dé mil é dé san, ké sa I ansèrv de rien pou lo tourism… la ou lé dann out tor, é La Rényon lé pèrdan dann in n’afèr konmsa. An pliské sa, kan ou i arbate in dézyèm karé pou la po patate !

Ala pa ke le Didier Robert, épi l’UMP, issi épi an Frans, la déside mète la min déssi Konsèy zénéral. Konmsa nora rofé konm l’Etat, épi Konsèy réjyonal… zot i gaspiy larzan. Rozman, i rosanm zot va rat zot bi. Moin lé près sir, lo kou va manké !

Justin