A nou réyoné nou néna labitid èk nout bon manièr kozé, kan i ariv pou anons in larivé in nafèr ni di touzour : La sézon la rantré. Par ékzanp pou anonss larivé mang, ni di sézon mang lé pa lwin, pou létshi, ni di sézon létshi i ariv, antansyon ni rant dann sézon syklonn…… Mé la zordi, sanm pou mwin nou la rant dann sézon la mantri pou lo kou. Lèr larivé, zot i koné a shak fwa néna zéléksyon, a shak fwa i goumant la doz la mantri, néna i di a zisto rézon, pa parské ou rakont la mantri in bon pé d’fwa ké aforss, aforss out mantri i dovwin vérité. Poukoué mi di sa ?

Lo prézidan d’rézyon èk son bann krièr d’nwit i vyinn fé in l’éxpozisyon, zot la mèt inn dé pano dodan pou vant zot politik èk inn dé dat, i prétan pou rant 1998 ék 2010 néna in gran vid, sof mon réspèk pandan 12 zan la rézyon té kapou i di ? Pa in sèl lisé la pousé ? Nou lé byin èz zordi pran la rout tamarin pou trafiké, inn ti néstan nou lé randi o por pou bann moun i ariv par lo sid. In la ryin fé ? Pou son kont a li, di a mwin koué ? Kansréti inn ti morso la rout, ousa i lé ? Kèl koté li la inogir in lisé ?

Nou, nou la pa bozwin ni sar kri la nwit partou, nou la pa bozwin fé réklam, sak lé fé, lé fé, i poura pa défé rozman. Minm si lo kont zordi lé pa la. I mank a nou lo tram-trin, la mézon sivilizasyon in lisé otélié dann lo sid. Rant in vré politik dé dévlopman pou nout péi èk in politik bat karé zoro la profèr fé in politik bat karé. Lo pli pir sé k’li kontinié distribié larzan la pa li. In zournal la di yèr, èk la kontinité téritorial, èk bann biyé pou vwayazé, mésié Didié i kont ashté la klas mwayinn. Lé in pé méprizan pou nou. Mé boudikont, rozman zoro larivé !