Pandan in bon pé d’tan, déssèrtin té i vé pa antann inn-dé kalité lo mo, té i rokoné mèm pa zot konm kékshoz valab, té i trouv azot ziska danzéré. A ! Parl pa "Listoir La Rényon", vik lavé aryink Listoir La Frans ! Di pa lo mo "péi", pou nout péi, pars aryink la Frans té i mérit lo nom "péi". Té i falé pa in mo konm "lidantité rényonèz", sansa "linité rényonèz" té i sort dan la boush in moun byin onèt ! Té i falé pa di bann mo konmsa, pars sansa tout sort kalité dézagréman té riskab ariv aou.

Ou té riskab pèrd out travay ! Pèrd sak dann tan-la té i apèl in sokour ! Plantèr, ou té i gingn pa larzan déga siklone ! Prézant pa dann biro d’vot, lo zour zéléksyon, pars bann nèrvis la droit lavé lo droi bate out mayi san tir koton... Épi si ou té i sava ésplinn, aou mèm té i fout an tol !

Zordi na in pé i domann koman zot va gingn anpèsh bann Rényoné byin konèt lo bann sivilizasyon zot zansèt : nout vyé zansèt malgash, komor, shinoi, tamoul, zarab konm ni di, mèm si zot i sort l’Inn… Mi pans mèm la kiltir la Frans zot i vé pa ni koné tro, pars i pé ète danzéré. Parl pa la kiltir rényonèz ! Sa i done azot bouton !

Alor zot i kri épi la télé, la radio é bann zournal la droit i bate tanbour, i fé dézord, i kri pli for k’ for pou anpèsh fé la MCUR... Mé, oplis zot i kri, oplis demoun va débisk azot épi zot mové lintansyon.
Toulfasson, konm di Kréol : « Rozoir vide i fé bon pé dézord ! ».

Justin