Moin la gard in n’afèr dann télé, in n’afèr la bien fé konprann amoin koman in gouvèrnman i pé tronpé rant la kominikasyon épi l’aksion. La kominikasion sé kan ou i fé dézord dsi in n’afèr ou la fé, sansa ou i fé, sansa ankor ou i kont fé. L’aksion sé kan ou i fé. Mank de po, gouvèrnman la konfonn souvan dé foi la kominikasion avèk l’aksion : in foi ké li la di, li obli fé, é li kroi li la fé.
Zot i koné Sarko l’avé di, kont dsi li pou èt lo prézidan lo pouvoir d’asha, mé firamézir ké lo tan té i pas, lo pouvoir d’asha té i pas sou la tab... Lo gouvèrnman té i obli son promès. L’èr-la, in minis la gard in kou kosa té i fé La Rényon èk bann produi COSPAR, é li la mazine li té i sar fé parèy dan la Frans èk son panyé la ménazèr. Li la kalkil si li nyabou fé bès bann pri désèrtin marshandiz, aprésa Prézidan Sarko nora gingn di li la tyinbo son promès. Alé oir, bann komèrs la Frans la pa fé in kont sanm sa, mèm in bonpé i koné pa ditou kosa i lé lo famé panyé la ménazèr. Touléka, sé sak moin la tandi dann télé, lindi dan l’apré-midi. Lo famé panyé la ménazèr la pa marsh in tyork é bann Fransé la vi la povrété mont dsi zot konm karapat dsi l’do bèf mèg. In bonpé té blijé fé la sharité avèk bann z’asosyasion.
In bon rézilta, mésyé prézidan ! Ankor in promès la kapot dann kivèt ! Ankor in kou la kominikasyon. Rozoir vid i fé bonpé dézord, mé li aroz pa zardin.

Justin