Mézami, mwin la anvi zordi ankor anparl kozman mwin la mark an-o la. Sa i romont dopi bèlaz-é-botan, si zot i vé dann tan zézikri téi marsh katpate – konm band zansien téi di – é mi pans lé vré ankor zordi. Sa sé invérité inivèrsèl, sa lé vré toute landroi é an tou-tan. Pars an tou-tan é toute landroi l’avé é néna demoune gran guèl pti sèrvèl, na pwin arien pou di mé i di, mé i koz.

Lé vré dann tan rozoir té an tol é kan li té plin li fé pa lo brui mé kan li té vid li fé antand ali… Antansyon, la pa pars koméla néna la politik mi di sa, mé in pé kant mèm. Pars pou antand sak défoi nou la atand mwin lé sirésèrtin ni pé di dan nout kèr : « Néna inn rant lé dé i sava roprézant anou pou sinkan, bondyé ségnèr marizozèf shien mèg mi oi nou mal. »

Alé ! Mi souète zot i rofléshi dsü nout kozman zordi é ni artrouv pli d’van. Sipétadyé.

Justin