Shak foi néna in nouvo gouvèrnman, néna in nouvo minis lédikasion nasional. Shak foi néna in nouvo minis lédikasion nasional, i fo li fé son réform. Shak foi li fé son réform, i an apèrsoi, avèk lo tan, nana in tik-tak i marsh pa. Alor, in n’ot nouvo minis, i fé in n’ot nouvo réform.

Astèr, lé possib fé lékspérians, mé solman i fo ou tienbo kont lo rézilta lékspérians. Sa konm la somèn kat zour : dann in bonpé landroi, i fé lékol kat zour par somèn, pou oir si lé possib, solman i ralonz la périod éskolèr. Ala lo nouvo minis, i anvoy sa baladé épi i siprime lékol le samdi.

Lékol va sanzé ? I prétan, i rovien “aux fondamentaux” : kossa i lé sa ? Aprann lir, ékrir, konté, sansa konète lo mond ni viv dodan ossi, sansa ankor aprann galman viv an parmi lo moun. Bouraz lo krane, sansa détak la lang, dézanklav la tète, prépar marmay pou ète in bann bon sitoiyin, in zour épi instruiyé ossi. Épi, nout kiltir, nout lang kréol, kossa i fé avèk ?

Dizon, konm dabitid, i bate tanbour, konmsa bann sak i dor konm lézar dann li lo samdi pétète sar kontan. Pétète va koul in biltin blé. Pétète, pétète, mé pa sir. Rozoir vide, i fé bonpé dézord mé pa plis !

Justin