Kisoi dann télé, kisoi dann radyo, kisoi ankor dann zournal la droite, moin lé sir é sèrtin zot la fine antann épi zot la fini vi La Réjyon Rényon apré bate tanbou. Si tan tèlman, sak i paré, sé lo pli gro anonsèr piblisitèr dann La Rényon. I pé domandé pou kosa. Pars in piblisité sé pou fé konète in produi é kan demoun i koné lé initil kontinyé fatig zorèy demoun konmsa. Bin si i kontinyé, sa la pi la piblisité pou bann produi, sa la propagann pou lékip lé an plas zordi. Dizon pou méssyé Didier épi son bann dalon. Sé pou prépar zéléksyon, pou domin, pou apré épi apré-apré ankor.

L’èr-la, sanm pou moin, na konm in détournman bann moiyin La Réjyon, dann l’intéré in klik la politik. Sanm pou moin solman ! Pars i oi pa la préféktir bouzé, i oi pa nonpli bann z’otorité la zistis s’anmèl dé sa. Noré té pli fasil porsuir si té bann kominis ! I di pa Gironcèl té kondané pars li la done travay in moun andikapé ? Poitan sa la pa kout dé mil é dé san konm la propagann réjyonal.

Dé foi, i bate tanbour dsi in n’afèr La Réjyon i pèy mé sé pa li k’i doi péyé. Kosa solon zot ? La kontinuité téritoryal an solde... pars sé l’Etat k’i doi pèy sa, é an sold pars gouvèrnman i dépans dé pti katsou anndan, alé oir li done milyon par dsi milyon pou la Corse. I fé arien ! Bate tanbour pou ramas bann voi dann zéléksyon. Dé foi sé in produi, i kout shèr mé i avans pa bokou sak i bénéfisyé, konm lo plan ordinatèr. Zot i pans bann marmay i travay myé èk sa ? Mi pans pa, toultan k’in létide sèryé la pankor fé pou in vré bilan so plan-la. Lo pli famé sé kan i bate tanbour pou bann shantyé : pou dé san tran kat milyon l’éro i paré... mé sak la démolir lété in bonpé plis ké sa é étone pa si lo nonm démandèr travay la fine désote san sinkant mil é i arète pa goumanté.

Bate tanbour, bate tanbour, va touzour arèst in n’afèr mé oplis v’alé, oplis nout provèrb kréol sar plizanpli vré... sak i di konmsa : « Rozoir vide i fé bonpé dézord ! »

Justin