Bèf i trap avèk la korde, demoun i trap avèk la lang ! Sa in patoi i di byin la vérité. Pars konm zot i koné, si demoun la gingn la parol, é si lo kréatèr la dmann k’i ansèrv so zoutiy-la konm k’i fo, lé pa touzour konmsa. La parol i pé ansèrv pou di la vérité, mé i ansèrv ossi pou mantir, dé foi, i ansèrv solman pou byin amontré pèrsone la pa nyabou fèrm out také. Tan pir si ou i di la kouyonade, provik ou i rès pa konm martin ki kouzi, tan pir si ou i fé konmsi ou i koné in n’afèr é ké ou i koné pa réèlman, tan pir si ou i ansèrv oute blag aryink pou fé kroir ou sé in moun nana grann kapasité, gran pouvoir, touzis si ou i gingn pa tir dolo dann rosh.
Donkalor, moi d’avril par-la, kan lo COSPAR lété apré négosyé, kan li la fé in plate-form séryé, pou sèy règ in pé lo bann problèm sosyo irzan, san dégrinn nout lékonomi é nout sosyété, in pé — gran mazistra — l’avé déside mète anlèr z’ot solissyon. L’èr-la, méssyé préfé la di k’i fo sign in l’akor san tardé, é ké li, pou son par, li lé paré pou komans fé pèy lo famé RSTA moi d’avril. Bann l’administrasyon l’avé l’arm-o-pyé é té paré pou anvoyé, paré pou péyé. Li té près paré pou anprète bann sindika son prop éstilo pou zot signé.
For ! For ! Tro for ! Si tèlman k’dé-troi moi apré, kan la fini par sign lo z’akor, toulmoun la pans té i sava roul ron, larzan té i sava gréné, é lo kont an bank bann ti kolon té i sar pran in sourir an transh papaye. Mé, élas, ménélas, mon kèr lé an filas ! La mashine té pa paré di-tou. L’arm té o pyé, mé l’avé poin bal dédan. Zordi ankor, nou lé moi d’séktanm, tré pé la fine gingn larzan, mé antansyon, si la pankor pèy pou lo moi d’mars-avril-mé, i fo ranpli papyé pou zin-zilyète-out. Di pa l’administrasyon i fé pa dilizans, di pa li akimil rotar, agarde solman koman li lé éfikas. Sof ké, pou l’instan, li gingn pa fé pèy in gran kantité d’moun ! Banna i oi pa, pou l’instan, la koulèr larzan.

Justin