An so moman mi pans in pé mon vié tonton, li lé finn alé pov diab. Poukoué mi pans a li pkis ké toultan ? Mon vié tonton té rèt dann lo sid é son promié fyi té rèt o Por é tanzaot li té rann a èl vizit laba. Kan li té i sava li di a nou « Zordi mi sar pèt in kou o Por ». Sanm pou mwin la minis la kopié si li « èl lé v’ni pèt in kou la Rényon ». Koué la fé kour la minis konm sa sibitman isi zordi ? Mi antan i di, madam la minis lé v’ni èk lo plan. In plan dévlopman pou nout péi ? In plan de sirvi pou bann plantèr ? Kèl èr, in plan pou rokin i di.

Pou anminn in plansh sèurf pou shakinn nout 170000 shomèr la désid glis in kou lo dimansh ? Pétèt toudinkou èl na souvnans i fo okip in kou nout 120 000 moun i koné pa lir ? Konm i fo mitializé lé mwayin pou fé zékonomi, kan i aprann fé seurf, i aprann osi a lir. Oubli pa madam la minis, néna 52 pour san la popilasyon i sousié in sèl zafèr zordi, sé gro sousi rokin.

A mwin, domann pa mwin landrwa néna rokin, mi nyaboura pa réponn. In bann i di sin zil, dopi lo tan mi sar pi la plaz sin zil. Dérnié fwa i romont, sanm pou mwin néna in ponyè réyoné i sar pi la plaz sin zil. In boug la koz dann télé é li di konm sa « A zot rényoné vyin défann zot nafèr sa lé a zot »Mi konpran pa poukoué li di sa, konm si li minm li rokoné do fèt ké lé pi a nou. Oté dérnié moman mi aprann madam la minis la pass osi par lo Por, pétèt konm mon vié tonton, ryink pou pèt in kou !