Souvan dé foi, moin la antann in kozman i di konmsa : oplis in n’afèr lé rar, oplis li lé shèr... épi lo kontrèr k’i di konmsa : oplis nana in n’afèr an kantité, oplis li lé bon marshé. Pou in pé, sé in bon loi vik sa i pèrmète, konm zot i di, gouvèrn le marshé, réguil lo pri !
Poitan, moin lé oblizé romarké sa i marsh pa bien konmsa, vik nana in bann oss-bèss i pé pa éspliké par lo pti loi an makotaz moin la di an-o la. Sa i marsh pa toultan konm in mékanik bien luilé, konm in sort mékanik in montr suiss. Anplis, i paré, i fo kont ossi avèk la konfians ou sansa lo mank konfians... kont ankor avèk lintansion bann éspékilatèr, épi d’ot kalité rézon mi mazine mèm pa k’i égzis...
Kossa i fé k’in baril pétrol, le pri i goumant ziska san sinkant dolar épi apré i diminié ziska sinkant... pétèt pou armont an flèsh dann in pé d’tan, pétèt ossi pou pik ankor plis la tèt... ki k’i koné ?
Moin, pèrsonèl, moin lé otorizé pa konprann in nafèr konpliké, mé bann gran kador ? Bann gran zournalis ? Bann gran zonm de sians ? Akoz, zot ossi, zot i tronp konm sa ?
I paré bann péi l’OPEP i sa désid diminié la prodiksion pétrol, pa pli loin k’moi d’désanm, konmsa, d’apré zot, nora la rarté, épi le pri va goumanté. Alor, lé vré, lé pa vré ? Zot na rézon, zot na tor ? Konm di la shanson : « Sak va viv va oir ! ». Tout fason, mèm si zot i tronp, i anpèsh ar pa zot kontinié koz la boush gran rouvèr !

Justin