Lindi, moin l’ashté zaksion...

Mardi, moin la gingn milion...

Mèrkrédi, moin la mont mon ménaz...

Zédi moin la prépar mon mariaz...

Vantredi, moin la parti bal ...

Samdi, moin la rant lopital...

Sa s’tin vié rangènn dann la Frans dizuitièm sièk... kan demoun rish la plas larzan dann la konpagni in bankié téi apèl Law... Mé lo kou la foiré é zot la artrouv azot dan lokisité.

Oui, lé ga ! Mé trakas pa : vik sa la spasé dann tan lontan, konm di lo kont, dann tan zanimo lavé la parol, i ariv ar pi sa zordi !

Zot lé bien sir ? Rapèl azot in pé l’afèr bann sibprime lariv dann Zétazini ! Rapèl azot ankor bann fonn pansion dann Langlétèr, sansa dann Lamérik : konbienn moun la vni o flan dann zafèr-la ! Ankor in n’afèr, kan lo miliardèr Maddoks la roul demoun dan la farine !

Oui, lé ga ! Mé sa la spas dann péi déor, sa la pa issi dann péi Bourbon !

A bon ? É bin ! Zot i kroi la poin d’moun La Rénion la tonm dann bann gob la ? É zot i kroi pa in pé va trok lo pa dann la défiskalizasion ? Moin oui !

Tout fason, ki vivra véra, pars sa sé in n’afèr k’i ariv solman bann vivan ! Mor, ou lé pi la èk sa !

Justin