Tan-si, i pé pa di La Rényon i mank l’aktyalité pars nout péi la pa in péi dorman. Nana bon kalité nouvèl, nana mové kalité nouvèl, mé an tou lé ka, nana nouvèl. La mèm pa tro bézoin alé rodé, nouvèl i ariv par la boush demoun dann radyo. Bann politik, bann z’asosyasion, bann sindika, la boush lé pa také. Sétaki na son blog, son sit, sétaki lé dsi bann rézo sosyo. Donk si ou i vé ranpli in zournal, i doi pa z’èt tro difisil. Poitan, na in pé i èm fabrik l’aktyalité.

In l’égzanp ? Yèr soir, l’avé in sobatkoz rant zournalis. Diréktèr “Zournal dé l’il” i sort in nouvèl dann fon son shapo, konm bann mazisyen i tir lapin, pizon, sansa kanar. Ala kosa li di : tout demoun i koné, dan sinkyèm sirkonskripsyon, Parti kominis i fé la kanpagn pou Jean-Claude Fruteau ! Ni koné bien nout parti na in sèl kandida dan sinkyèm sirkonskripsyon, sé Eric Fruteau : Elie la di sa Sint-Sizane dovan in ta èk in paké d’moun, é dopi so zour-la, na poinn zour nout parti la di in n’ot afèr. Mé solman, lo zournalis, mèm si li rokoné ofisyèlman lé konmsa, ala ké li di la réalité d’térin la pa konmsa. Réalité d’térin ? Sé sak nout dirizan é militan fidèl i di é i fé. La pa sak in zournalis i pé dan son tèt an mové santé pou manipil demoun !

In n’ot l’égzanp ? Lo blog Dupuy. Ala ké li di Françoise Vergès la fé "dé pyé é dé min" pou gingn in post minis. Li koné pa arien, moin non pli, mé li invant in soi-dizan vérité, konmsa tout in bann shien, sak la anvi mord, i mèt a mord. Pétèt la fé mal zot tété oir Françoise apré koz avèk prézidan la Répiblik lo zour li la pran son fonksyon. Pétèt ? Mé sirman l’intansyonn mal fèr, l’intansyon sali la répitasyonn moun, é sa lé pa zoli ditou, lé pa moral... Mé sé pa si i pé parl moral kan i parl d’in boug konmsa épi bann molos komandé i suiv ali dan son bann kalomni.

Touléka, sa i évit anparl bann vré problèm La Rényon.

Justin