Na in’éstan, moin té apré lir sak demoun i pans dsi lo kozman lo Gamarus la di dann in rényon Huguette Bello kan toudinkou li la pran ali pou in Mirabeau a l’anvèr. Lé sir, in bonpé d’moun la fé sif son zorèy é la pa mank dir ali, dann in péi konm La Rényon, lé bien bon réfléshi avann kozé. Li la mèm gingn in rèstrankil èk Jean-Yves Langenier li mèm en plin dann biro la préféktir. Nout kamarad Langenier la bien di, li sé in om lib.

Mi pans sé sa la vérité. Pars moin lé sir-é-sèrtin, si nout kamarad l’avé in gro problèm konsyans pou prézant ali konm kandida dan lo dézyèm sirkonskripsyon, si apré an avoir analiz lo ka li té i pans li té pé pa èt kandida, li noré rofizé. Pars dan nout parti, lé pa posib èt kandida kont son volonté. Sé sa nout liberté ! Na poin pèrsone lé kapab fé in présyon malonèt kont nou pou obliz anou fé in n’afèr ni vé pa. Mi diré pa lé partou konmsa, pars lo shantaj, la présyon, la ménas i égzis... pa dan nout parti, mé dan d’ot. Sa lé sir !

An pliské sa, kan désèrtin i di Paul Vergès la komann ali pou èt kandida, zot i insilt dé pèrsone : inn sé nout kamarad Langenier, l’ot sé nout kamarad Paul Vergès, dé pèrsone la soubat tout zot vi pou la liberté bann Rényoné. Sak i di sa zordi, pétèt li koné pa bien lé shoz, li koné pa bien nout parti é son bann pli sèryé dirizan. L’èr-la, l’ignorans lé pétèt éskizab... Mé pou sak la fine fé in bon parkour avèk nout bann dirizan, sak i koné bien lo parkour Paul Vergès épi sèk Langenier i pé pa di in n’afèr konmsa pars zot i koné zot l’apré manti.

Mi diré mèm, sak i antann dir z’afèr konmsa épi zot i bat la min, sansa zot i di pa arien, zot lé koupab galman. Pars, moin pèrsonèl, si mi antann mové kozman dsi l’moun, si moin lé sir sa lé pa vré, bin lé ga, mi rès pa la. Si moin nana mon dé mo pou di, mi di. Si moin nana mon dé mo pou ékri, mi ékri. Pou moin, sa i fé parti d’mon liberté, mon réspé pou bann prinsip mon parti.

 Justin