Matante Zélida la ékrir Justin :
Mon shèr nové, mon spès salté,
Mi éspèr so kou-si o moins, vou va nyabou ténir vot lang épi vot plime déssi voiyaz madame la ministrèz l’Outre-mèr. Mi éspèr ou va évite de dir èl la vni pou aryin. Pars o moins èl l’amène la TNT dan nout péi, konmsa, san pèy an plis, Rényoné va gingn dis shène télé pou rogardé. Sa lé pa byin sa ? Bin si sa lé pa byin, bin sa i vé dir zot i rode tro. Romark, lé vré, zot bann rouj-de-fon, zot i koné aryink réklamé, réklamé, par dsi réklamé. Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr,
Vi parl amoinn télé. Lé normal vi k’bon pé d’moun i parl désa… pou l’instan. Konm di lo kont : "Tou bo, tou nouvo !". Mé inn foi sar fine bate tanbour la-dsi, sa va rante dan la routine é i koz arpi d’sa, sansa bokou moins.

Moityé égal ?
Solman nana kant mèm in n’afèr i dovré an-nuir aou in pé, sé la kantité d’shène. Nana vin pou la France épi dis pou La Rényon. Donk, késtyonn l’égalité, konm vin diviz an dé i fé dis, nou lé moityé égal.

Do pin èk bann jé d’sirk ?
Na ankor in n’afèr i fo romarké. In z’afèr vyé konm lo monn. Déza bann Romin té i aplik sa. Té i di konmsa : "Kosa lo pèp i domann, do pin (sansa do ri) avèk bann jé d’sirk !". Sa sé dé shoz i pé dir, mé sa lé pa forsé d’ète vré.

Justin