Mézami, konm shake ané bande jenn rényoné diplomé i pass zot diplôme avèk souvan-défoi bon-bon rézilta. La prèv la pa trape diplôme-la dsou la pate shoval, la prèv zot lé an kapassité avèk zot prope travaye pou amors in gayar karyèr. Mé shake ané bande sèrviss ofisyèl i fé konprande azot pou l’éstaz i fo alé laba dann la métrôpôl-avèk si possib patate sho dan la boush.

Zot konm mwin, nou lé a d’mandé pou kossa noute bande jenn épi noute bande konpétanss la bézoin alé an éstaz dann lo métrôpôl. Sirtou dann in sèktèr konm lédikassion nassyonal. Pars banna lé pli gabyé ké nou ? Pars laba zot nora in formasion di tonère dé zeus ? Pou ma par mi konprandré i anvoye noute bande jenn dann péi lékol i marsh bien, mé pa dann inn konm La franss i bate dé zèl… La pa mwin k’i di sa, mé son klassman an parmi bande dèrnyé péi l’OCDE i zoué konte li.

Donk si la pa pou sak mwin la mark an-o la, pou kossa alor ? Sréti pa pou piye noute bande sèrvo ? Sréti pa pou fé la plass pou bande déor arivé ? Lé vré mi anparl ar pa lo gran ranplassman konm in pé i di. Lé vré pou okipe la plass i anmanke pa laba mé mwin néna dê shoz pou di : inn sak i arive i koné pa lo péi é i fo li pran son tan-la plipar nora zamé noute kiltir rényonèz – amoinss ké lo bande zarivan sé bande pèrpétyèl tourist-vakansyé ?

Alor, mi panss i doi arète in kou avèk son bande mézir k’i rotourn konte nou, i fo arète obliz nout zénèss alé déor.A bien kalkilé in pé i pouré dir so bande mouvman-la i pouré apèl piyaz noute bande sèrvo si i rgarde bien la totaité bande mouvman alé-rotour.