Mésyé, médam, la sosyété mi pans konm moin zot i koné kozman-la é pa arienk dopi dé zour, pars lo léksprésyon i komans a daté. Si ni kalkil bien sa lété in répons téi fé in moun kisoi apré gaspiy in n’afèr, sansa i domann tro pou arien. Moin la mèm antandi in zour in bononm té apré di son garson sépa la gaspiy in n’afèr sansa la pa pran la prékosyon k’i fo,brèf konm di Pépin li la id son garson : « Ou i kroi sa zoizo i kaka a la vouèl ou ? ».

Antouléka, m rapèl étan jenn la pa ariv in sèl foi, nou la roul galé pou oir si i trouv in n’afèr dsou.Moin pèrsonèl moin la pa trouv arien sof in vozin téi rode trézor toultan é li téi mète zofrann pou amadoué lo gardienn trézor é bin kan nou téi pass parla si l’avé in n’afèr pou rékipéré ébin nou téi rékipèr...avèk la pèr pars nou l’avé la krintiv in mové léspri i rèss dsi nou.Mi pans pa sa l’arivé !

Mé moin lé pa sir par l’fète.Alé ! Mi kite azot rofléshi la dsi pars boudikont a bien kalkilé llo kozman i vé dir sirtou : « i gingn pa arien pou arien »-é ni artrouv pli d’van.
Sipétadyé