Samdi apré-midi, la éspas in n’afèr inportan dann Por : lo mèr Jean-Yves Langenier la fé l’inogirasion in l’avni. In joli l’avni pou ashèv joinn ron-poin Roz dé van avèk lo Por-ouèst. Donk nana éstèr in travèrsé d’la vil. Pou kosa ? Pars lété konm sa, la vil té i tourn son do avèk la mèr, mèm avèk lo por. Sa lété in l’éritaz l’istoir la vil, é kan Paul Vergès la rant mèr la komine, son l’ékip la désid rolié la mèr avèk l’intérièr. In bon l’idé ! Mé pou fé sa, la pran lo tan, pars té i falé diskit avèk la popilason, é pars konm lo mèr koméla i di, l’Eta la pa zoué son rol konm k’i fo. Zordi la fini, i rès l’ansien por épi l’antouraj pou aménazé. 

Sé in n’afèr inportan, mé la pa vi sa dann télé, ni dann Rénion Promèr, ni dsi Antène. La pa antann l’ésplikasion lo mèr dann télé. Domaz, mé i fo kroir sa i rant pa dan l’info konm banna i oi lé shoz. Sa i tonm bien dann Somèn la près !

Konsèy minisipal Lo Por la désid nonm lo l’avni « Avni Chagos ». Pou kosa ? Pars nout bann frèr é nout bann sèr té i viv dan bann z’il Chagos la artrouv azot déporté, loinn lo péi zot épi zot bann z’ansèt té i viv dopi diz-uitièm sièk. Olivier Bancoult i di, dann Peros Bahnos l’avé in tonm daté d’1798... zordi, a s’ki paré, bann z’Anglé la fine shanboul tonm-la. Konm nou, in bonpé zot z’ansèt té z’ésklav, la siport la trèt bann noir, épi apré sa, in dézièm déportasion, ala zot lé dann bidonvil Moris épi Sésèl. Lo Por la pa obli azot : l’ané 1989, Olivier la fé son promié konférans de près internasional avèk Paul Vergès, mèr la komine dann tan-la. In gran l’éspoir pou banna !

Sa in n’afèr for pou zot, bann Chagosien ! Sa in n’afèr for pou bann Portoi ! Sa lé for pou nou, Rénioné ! Mé bann télé la pa vouli partaz sa avèk nou. Zot té pa la kan la fé la konférans do près ! Zot lété pa la kan la fé l’inogirasion ! Daoir, pou zot, sa la pa l’informasion. Ankor in foi, sa i tonm bien dann Somèn la près !

Kosa nora arivé si in loto l’avé brilé ? Bann kaméra nora pa tard rapliké pars sé sa l’informasion pou Rénion Promièr épi pou Antène. Sa i tonm bien dan la Somèn la près !

NB : Zot i vé mi rakont azot in n’afèr zot la pa vi ? Bann dansèr-dansèz chagosien apré dans maloya avèk bann maloyèr Lo Por, avèk la mizik la troup Kontenèr. Métisaz kiltirèl ? Sansa rotour la sours nout z’ansèt ? Konm zot i vé, mé pou moin, sa té for, tro for.

Justin